«Балалықтың көңілді мерекесі»

Жаздың алғашқы күні аса шуақты болып жанды нұрландырды. Қолдарына түрлі түсті жалаушалар, шарлар, әсем гүлдер ұстаған жүздері шаттықтан алаулаған балалар Балаларды қорғау күнін атап өтуге асығып келеді. Оларды қаланың орталық алаңында ертегі кейіпкерлері түрлі қызықты ойындармен қарсы алды. Әр жерде тамылжыған әуен шырқалып, музыка ойнап тұрды. Орталық алаңда қала мектептерінің балалар шеруі өтті. Атбасар ауданының әкімі  А.Н. Никишов, аудандық мәслихат хатшысы Б.А. Борумбаев және Атбасар ауданының соғыс және еңбек ардагерлері Кеңесінің төрағасы И.И. Комиссаровтар алаңға жиналған балаларға жылы лебіздерін білдіріп, мерекемен, оқу жылының аяқталуымен және жазғы демалыстың басталуымен құттықтады. Бұдан әрі мерекелік  концерт, балалар дискотекасы, конкурстар, ойындар, кішкентай жануарлармен кездесулер тағы да көптеген қызықтар балаларды еліктіріп, қызыққа кенелтті.